Охрид еко 2027

Регионот каде што ќе се реализира проектот?
Проектот ќе се реализира во Југозападниот плански регион, на подрачјето на Охридското Езеро. Активностите ќе бидат насочени кон повеќе приоритетни локации долж езерскиот брег, со фокус на заштита и обновување на природните живеалишта и мрестилишта на охридската пастрмка.


Целна група: Кому ќе му помогне проектот?
Проектот е наменет за локалната заедница, посетителите на Охридското Езеро, љубителите на природата, младите, еколошките организации, нуркачката заедница и сите граѓани кои се залагаат за зачувување на животната средина. Најголема корист ќе има природниот екосистем на Охридското Езеро преку подобрување на состојбата на подводните живеалишта и создавање подобри услови за опстанок и размножување на ендемичните видови.


Кој може да учествува во проектот?
Во проектот можат да учествуваат лиценцирани нуркачи, волонтери, претставници на граѓански организации, институции, ученици и студенти, љубители на природата, како и сите заинтересирани граѓани кои сакаат активно да придонесат во заштитата на Охридското Езеро. Учесниците ќе бидат вклучени согласно природата на активностите и нивното претходно искуство, со почитување на сите безбедносни процедури.


Дали може волонтери да се ангажираат во проектот? Доколку да, како?
Да. Волонтерите ќе имаат значајна улога во реализацијата на проектот. Тие ќе можат да помогнат во логистичката организација, приемот и координацијата на учесниците, поддршката при собирање и селектирање на отпадот на брегот, дистрибуцијата на информативни и едукативни материјали, како и во активностите за подигнување на јавната еколошка свест преку промотивни настани и кампањи. Волонтерите кои поседуваат соодветни нуркачки квалификации ќе можат да се вклучат и во подводните активности, согласно безбедносните правила и организацијата на проектот.


Кои цели треба да се постигнат со проектот?
Главната цел на проектот е заштита и обновување на подводниот екосистем на Охридското Езеро преку чистење на мрестилиштата на охридската пастрмка и отстранување на цврстиот отпад од дното на езерото. Со проектот се предвидува: отстранување на отпадот од приоритетни локации; подобрување на условите за природен мрест и опстанок на охридската пастрмка; зачувување на биолошката разновидност и природните живеалишта; подигнување на еколошката свест кај граѓаните преку медиумски и едукативни активности; поттикнување на волонтерството, меѓународната соработка и активното учество на заедницата во заштитата на животната средина; создавање долгорочен модел за редовно следење и заштита на подводните локалитети.